Japonia ka shprehur shqetësim të madh për përdorimin e mundshëm të armëve bërthamore nga Rusia kundër Ukrainës. Zëdhënësi i lartë i qeverisë njoftoi të hënën një ndalim të materialeve që mund të përdoren për armë kimike në 21 organizata ruse.
“Si i vetmi vend në botë që ka pësuar sulme bërthamore, ne kërkojmë fuqishëm që kërcënimi ose përdorimi i armëve bërthamore nga Rusia nuk duhet të ndodhë kurrë,” tha shefi i kabinetit, Hirokazu Matsuno, në një konferencë të rregullt për shtyp, shkruan ABCNews.
Matsuno po i përgjigjej një pyetjeje në lidhje me komentet e këshilltarit amerikan për sigurinë kombëtare, Jake Sullivan, të dielën në lajmet e CBS, se Shtetet e Bashkuara do të veprojnë “në mënyrë vendimtare” në rast të një sulmi bërthamor rus në Ukrainë.
I pyetur nëse Japonia miraton përdorimin e mundshëm të armëve bërthamore nga Shtetet e Bashkuara kundër Rusisë, Matsuno refuzoi të komentojë me arsyetimin se ishte një pyetje hipotetike.
Qeveria japoneze ndaloi të hënën eksportin e materialeve që mund të përdoren për armë kimike në 21 organizata ruse, duke përfshirë laboratorët shkencorë. Masa u miratua nga kabineti pas një vendimi të ministrave të jashtëm të Grupit të Shtatë, javën e kaluar.