“Vladimir Putin nuk po bën bllof për përdorimin e armëve bërthamore nëse është e nevojshme”, tha ish-presidenti rus, Dmitri Medvedev.
Medvedev, nënkryetar i Këshillit të Sigurimit të Rusisë, paralajmëroi gjithashtu se Moska ka të drejtë të përgjigjet “pa shumë konsultime”, pasi tensionet me Perëndimin rriten mbi referendumet e mbajtura në zona të mëdha të territorit ukrainas të pushtuar nga Rusia.
“Më duhet t’ju kujtoj përsëri – për ata veshë të shurdhër që dëgjojnë vetëm veten e tyre. Rusia ka të drejtë të përdorë armë bërthamore, nëse është e nevojshme,” tha Medvedev, duke shtuar se do ta bënte këtë “në raste të paracaktuara” dhe në përputhje të rreptë me politikën shtetërore.
Aleati 57-vjeçar i Putinit, i cili dikur e prezantonte veten si një reformator që ishte gati të punonte me Shtetet e Bashkuara për të liberalizuar Rusinë, e ka rishfaqur veten muajt e fundit si anëtari më i ashpër publikisht i rrethit të Putinit.
Komentet e tij vijnë derisa Rusia përgatitet të aneksojë pjesë të mëdha të territorit ukrainas pas “referendumeve të rreme” në rajonet e kontrolluara nga Rusia.