Liderja e ekstremit të djathtë “Vëllezërit e Italisë”, Giorgia Meloni, ka deklaruar se Ukraina mund të llogarisë në mbështetjen e Qeverisë së re italiane.
Kështu ka thënë ajo përmes një postimi në llogarinë e saj në Twitter, në mesazhin e saj dërguar presidentit të Ukrainës, Volodymyr Zelensky.
“E dini se mund të llogarisni në mbështetjen tonë besnike në kauzën për lirinë e popullit ukrainas. Qëndroni të fortë dhe kini besim”, shkroi Meloni.
Dear @ZelenskyyUa, you know that you can count on our loyal support for the cause of freedom of Ukrainian people. Stay strong and keep your faith steadfast! 🇮🇹🇺🇦
— Giorgia Meloni 🇮🇹 ن (@GiorgiaMeloni) September 27, 2022
Kjo deklaratë e saj vjen pas mesazhit urues të presidentit ukrainas, pasi partia e Melonit ka fituar zgjedhjet e përgjithshme, të dielën e 25 shtatorit.
“Ne vlerësojmë mbështetjen e vazhdueshme të Italisë për Ukrainën në luftën kundër agresionit rus. Ne llogarisim në partneritetin produktiv me Qeverinë italiane”, shkroi Zelensky në Twitter.
Congratulazioni a @GiorgiaMeloni e al suo partito per la vittoria alle elezioni. Apprezziamo il sostegno costante dell’Italia all'Ucraina nella lotta contro l'aggressione russa. Contiamo su una proficua collaborazione con il nuovo governo italiano.
— Володимир Зеленський (@ZelenskyyUa) September 27, 2022
Edhe kryeministri në largim i Italisë, Mario Draghi, ka qenë një prej mbështetësve më të fuqishëm të sanksioneve të Bashkimit Evropian kundër Rusisë, për shkak të luftës në Ukrainë.
Partia e ekstremit të djathtë, “Vëllezërit e Italisë”, lidere e së cilës është Giorgia Meloni, sipas raportimeve të para të Exit-Poll, ka fituar zgjedhjet e Italisë, të cilat janë mbajtur të dielën e 25 shtatorit.
Nëse të njëjtat sondazhe konfirmohen, atëherë Meloni do të formojë qeverinë, duke u bërë kështu kryeministrja e parë grua në vend, shkruan BBC.
Ajo parashikohet të fitojë midis 22-26% të votave, thotë një sondazh i Rai, përpara rivalit të saj më të afërt Enrico Letta nga qendra e majtë.
Koalicioni i krahut të djathtë ka fituar diku mes 41 e 45 për qind të votës së përgjithshme dhe aleanca e majtë mes 25 dhe 29 për qind.
Pjesëmarrja ishte rreth 64.7%, dramatikisht e ulët në kohën e mbylljes së votimeve, ka thënë ministria e brendshme e Italisë.
Vendimi se kush do të bëhet lideri i ardhshëm i Italisë varet nga presidenti, jo nga Giorgia Meloni dhe kjo do të marrë kohë.
Aleatët e saj, Matteo Salvini i Ligës së ekstremit të djathtë dhe Forza Italia e qendrës së djathtë të Silvio Berlusconit kanë pasur të dy lidhje të ngushta me Rusinë.