Më 25 gusht të këtij viti, Bashkimi i Sindikatave të Pavarura të Kosovës (BSPK), e kishte shpallur grevën e gjithmbarshme, në të cilën kishin marrë pjesë mësimdhënësit e të gjithë sektorit të arsimit dhe shërbyesit civilë.
Pas më shumë se një muaji grevë, u vendos nga vetë anëtarët e sindikatave që greva të pezullohet deri në janar të vitit të ardhshëm. Kur u mendua se kaloi kriza dhe u qetësuan gjakrat në mes të Sindikatave dhe Qeverisë, kjo e fundit ka vendosur që për muajin shtator të mos ua procesojë pagat mësimdhënësve me arsyetimin se kanë qenë pjesë e grevës.
Por, të njëjtën gjë nuk e kanë bërë për shërbyesit civilë, të cilëve u kanë dalë pagat në llogaritë e tyre bankare.
Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, është shprehur i indinjuar me këtë vendim të qeverisë, të cilin e ka quajtur diskriminues e hakmarrës.
“Fatkeqësisht ende nuk janë procesuar në sistemin arsimor, teksa e keqja shtohet se janë procesuar për shërbyesit civilë që ishin në grevë dhe kjo është një segregacion, nuk ka çfarë të dyshohet për tjetër, përveç ndonjë qëllim që vetëm qeveria e di”, ka thënë ai.
Tutje, Jasharaj ka paralajmëruar “situatë të acaruar”, nëse nuk procesohen pagat deri më 5 tetor të këtij viti.
“Uroj që deri në kufirin ligjor më 5 tetor, Qeveria të mos e bëjë edhe këtë goditje, por t’i procesojë pagat, përndryshe do të kemi situatë të acaruar. Edhe mediat e kanë parë se edhe kur u bë pezullimi i grevës, votat pro dhe kundër ishin kogja të përafërta. Nuk është e drejtë të shkelen ligjet dhe të shkelet humaniteti. Nëse bëhet kjo goditje atëherë s’kemi si të mos besojmë se Qeveria i do grevat dhe përplasjet”, ka thënë ai.
Ndryshe, gjatë ditës së hënë, shefja e Grupit Parlamentar të LVV-së, Mimoza Kusari-Lila, ka deklaruar se punëtorët që ishin pjesë e grevës nuk do të paguhen për muajin që shkoi.