Aleanca për Ardhmërinë e Kosovës (AAK) do të marrë pjesë si subjekt i vetëm në zgjedhjet e parakohshme të 28 dhjetorit.
Partia ka dorëzuar aplikimin për certifikim pak orë para mbylljes së afatit, pa hyrë në marrëveshje koalicioni me ndonjë parti tjetër, ka konfirmuar Komisioni Qendror i Zgjedhjeve.
Kjo nënkupton se AAK-ja mund të përfshijë emra nga parti të tjera vetëm brenda listës së kandidatëve, por nuk mund të ndryshojë emrin në fletëvotim, pasi nuk është regjistruar si koalicion.
Si subjekte të vetme në garë janë regjistruar edhe Partia Demokratike e Kosovës (PDK) dhe Lidhja Demokratike e Kosovës (LDK). Ndërkohë, Lëvizja Vetëvendosje ka hyrë në një koalicion të përbashkët me Partinë Guxo, Alternativën dhe PSHDK-në.
Nisma Socialdemokrate ende nuk ka bërë të ditur nëse do të garojë në koalicion apo nëse anëtarët e saj do t’i bashkohen listave të partive të tjera.
Në zgjedhjet e shkurtit, AAK dhe Nisma garuan së bashku në një koalicion të përbashkët, përmes të cilit siguruan tetë ulëse në Kuvend.