Abdixhiku kërkon dorëheqjen e Kurtit, thumbon edhe PDK-në

Lidhja Demokratike e Kosovës ka thënë se kryeministri i Kosovës, Albin Kurti duhet të japë dorëheqje dhe pastaj, si rrjedhojë, të shpërbëhet Kuvendi. Kjo parti ka theksuar se s’do të bëhet pjesë e asnjë marrëveshje të prearranzhuar prapa dyerve të mbyllura

Kreu i LDK-së, Lumir Abdixhiku, në Bibliotekën Kombëtare ‘Pjetër Bogdani’, ku ka zhvilluar takim me profesorë universitarë e me diplomatë, 13 korrik 2023.

Kryetari i Lidhjes Demokratike të Kosovës, Lumir Abdixhiku, ka kërkuar dorëheqjen e kryeministrit Albin Kurti dhe pastaj shpërbërjen e Kuvendit.

Abdixhiku ka thënë se Kurti po tenton ta instrumentalizojë opozitën si shpëtim nga dështimi dhe se për këtë, sipas tij, ai tashmë ka gjetur aleatin.

Por, kreu i LDK-së ka theksuar se këtë instrumentalizim partia e tij nuk e pranon.

“Pas tre vjet e gjysmë populizëm dhe pa ndonjë progres thelbësor, pas tre vjet e gjysmë polarizimi, ndarjeje shoqërore e nxitje të propagandës pa asnjë konsideratë njerëzore e politike, Kryeministri i Kosovës ka zgjedhur instrumentalizimin e opozitës si shpëtim individual nga dështimi i madh. Fatkeqësisht, në këtë instrumentalizim, ka gjetur aleatin. LDK-ja nuk e pranon këtë instrumentalizim në asnjë rrethanë”, thuhet në komunikatën e LDK-së.

Siç thuhet në komunikatën për medie, LDK-ja është e gatshme për zgjedhje të parakohshme, por sipas tyre, fillimisht duhet të japë dorëheqje kryeministri.

“Për këtë, duhet dorëheqja e Kryeministrit, si rruga e duhur drejt shpërbërjes së Kuvendit dhe shkuarjes në zgjedhje të parakohshme. Dorëheqja, më pas shpërbërja dhe në fund data. Ky është rendi i gjërave”, thuhet në reagimin e LDK-së.

Gjithashtu, LDK-ja ka konsideruar se në këto ditë fokusi i institucioneve dhe i partive politike duhet të jetë te çështja e anëtarësimit të Kosovës në Këshillin e Evropës, proces të cilin, sipas tyre, me papërgjegjshmërinë e tij, e ka rrezikuar rëndë vetë kryeministri.

LDK-ja mes të tjerash ka theksuar se nuk do të bëhet pjesë e asnjë marrëveshjeje të prearanzhuar prapa dyerve të mbyllura e darkave.

“LDK-ja e refuzon farsën e darkave si mbulesë të një uniteti politik që u përbuz kur u ofrua tash e tre vjet e gjysmë. LDK-ja thërret për një unitet të djathtë gjithëkombëtar, si lidhje përtejpartiake, si lëvizje shpëtimtare. Gjendja e tanishme, politike, ekonomike, diplomatike e sociale kërkon lidership të ri në Kosovë. Rëndesa ekonomike, pagat e ulëta, çmimet e larta, sistemi shëndetësor i rrënuar e arsimi i mbetur prapa, sikurse dhe ngecjet enorme integruese për në BE e anëtarësuese për në NATO, po shkaktojnë çdo ditë zbrazjen e Kosovës, me nga 173 qytetarë duke u larguar nga vendi ynë çdo ditë e secilën ditë”, thuhet tuje në komunikatën e LDK-së.

LDK-ja u ka bërë thirrje të gjitha palëve politike që të kërkojnë dhe të punojnë vetëm në drejtim të dorëheqjes legale të kryeministrit, “sepse ajo faktike tashmë ka ndodhur”.

Shija e redaktorit

EURO DUELI – Nisja e aventurës futbollistike në TV Dukagjini

Sonte ka nisur emisioni “Euro Dueli” në TV Dukagjini, emision kushtuar Kampionatit Evropian. Analiza të detajuara, debate interesante, show, do t’i përcjellin shikuesit përgjatë një...

Parada e Çlirimit, FSK e Policia parakalojnë në Prishtinë

Pasardhëse e UÇK-së, e ushtria e shtetit të pavarur të Kosovës nuk kishte si të niste sot parakalimin në 25 vjetorin e çlirimit pos...

Ditët e para të çlirimit, rrëfim nga ish-zyrtari për informim...

Për ditë me radhë në territorin e Maqedonisë, ushtarët e NATO-s stërviteshin për përballjen me forcat serbe në Kosovë. Më 10 qershor në Kumanovë, Serbia...

Të fundit nga rubrika