Kryetari i LDK-së, Lumir Abdixhiku, në emisionin Debat Plus ka folur lidhur me zgjedhjen e Dimal Bashës kryetar i Kuvendit.
Abdixhiku është shprehur se pozicionet, sikurse ai i kryetarit të Kuvendit, në botën demokratike trajtohen jo vetëm me përmbajtjen e personit që e mbush atë vend pune, por edhe me gjithë pikëpamjet e atij ose asaj.
“Ne besojmë si LDK se ky nivel i përfaqësimit në institucionin më të lartë nuk bëhet fjalë për njërin prej deputetëve të rëndomtë nga 120 deputetët që vijnë me votë të popullit – është zgjedhje e qytetarëve të Kosovës. Por përfaqësimi në institucionin më të lartë duhet t’i ketë disa standarde dhe kritere, të cilat natyrisht që Dimal Basha s’është as afër t’i ketë e as t’i përfaqësojë. Madje, me gjithë vulgaritetin e tij shprehës që ka pasur në gjithë karrierën e vet politike përçarëse e shpifëse, në çdo qëndrim të tij e bën jo shembull të mirë për t’i prirë institucionit më të lartë”, ka thënë Abdixhiku.