Asociacioni i Gazetarëve të Kosovës ka dënuar fyerjet, etiketimet dhe kërcënimet ndaj Fidan Jupollit, autor i emisionit satiriko-politik “DPT Te Fidani”.
Sipas AGK-së, sulmet ndaj Jupollit kanë ardhur pas komenteve dhe emisioneve që lidhen me protestën në Prishtinë për ish-krerët e UÇK-së dhe krizën rreth zgjedhjes së presidentit.
AGK-ja ka shprehur mbështetje për Jupollin që të ndërmarrë veprime ligjore për denoncimin e sulmeve, të cilat, sipas AGK-së cenojnë edhe integritetin fizik të tij dhe të familjes së tij.
Po ashtu, AGK-ja u ka bërë thirrje akterëve politikë dhe përkrahësve të tyre që mospajtimet rreth çështjeve me interes publik të mos i shndërrojnë në kërcënime dhe dhunë.
“Liria e shprehjes dhe medias është e drejtë themelore e garantuar me Kushtetutën e Republikës së Kosovës”, thuhet në reagimin e AGK-së.