Jostabiliteti i çmimeve në sektorin e ndërtimit ka paraqitur probleme të mëdha, sidomos te komunat e Kosovës dhe kompanitë e kontraktuara për projektet e tyre.
Rritja e shpejtë dhe atë në përqindje të madhe e çmimeve të materialit ndërtimor, ka qenë e paparashikueshme për kompanitë, të cilat në kohën kur janë kontraktuar nga komunat përkatëse, janë shërbyer me çmime shumë më të ulëta.
Me këtë rast, Asociacioni i Komunave të Kosovës dhe Oda Ekonomike e Kosovës i kanë dërguar Qeverisë së Kosovës tri kërkesa, që lidhen me kontratat në projektet e investimeve kapitale, ndër to kanë kërkuar funksionalizimin e
“1. Të plotësohet dhe funksionalizohet Bordi i Organit Shqyrtues të Prokurimit (OSHP).
2. Të anulohen procedurat për të gjitha aktivitetet e prokurimit që janë në kontekste, dhe të kthehen në ritenderim për shkak të ngritjes së çmimeve.
3. Të gjendet mundësia e rishikimit të kontratave aktuale dhe ndryshimit të çmimit të tyre konform ngritjes së çmimeve në lëndën e parë për projektet në investimet kapitale (ose edhe sipas indeksimit të sektorëve bazuar në të dhënat e Agjencionit të Statistikave të Kosovës)”, thuhet në njoftimin e AKK-së.
Situata e krijuar me rritje enorme të çmimeve, sipas AKK-së dhe OEK-së, mund t’i detyrojë operatorët ekonomikë të tërhiqen nga marrëdhëniet kontraktuale.
Kjo, sipas tyre, do të kishte pasoja te bizneset dhe te të punësuarit e tyre.
Në njoftim thuhet se, kërkesa drejtuar qeverisë është nënshkruar nga Kryetari i Asociacionit të Komunave të Kosovës Agim Aliu dhe Kryetari i Odës Ekonomike të Kosovës Berat Rukiqi.
Kompanitë ndërtimore në vështirësi të ekzekutimit të punëve pas rritjes së çmimeve