Një aksident trafiku me pasoja fatale ka ndodhur mëngjesin e sotëm në rrugën Carralevë-Komoran, ku ka humbur jetën një i mitur.
Lajmin e ka konfirmuar zëdhënësja e Policisë së Kosovës për rajonin e Prishtinës, Flora Ahmeti, e cila bëri të ditur se rasti është raportuar rreth orës 09:00.
“Sot rreth orës 09:00, kemi pranuar informatën se në rrugën Carralevë-Komoran ka ndodhur një aksident trafiku me pasoja fatale. Në këtë aksident ka qenë i përfshirë një automjet. Si pasojë e aksidentit, ngasësi i automjetit nuk ka arritur t’u përballojë plagëve dhe i njëjti ka vdekur”, ka deklaruar Ahmeti.
Sipas saj, vdekja e viktimës, mashkull i mitur, është konstatuar nga ekipi mjekësor në Qendrën Klinike Universitare të Kosovës (QKUK).
Lidhur me rastin, hetimet janë duke u zhvilluar nga njësiti rajonal i trafikut, i cili po punon për sqarimin e rrethanave që çuan deri te aksidenti tragjik.