Policia e Nepalit ka thënë se ka hequr dorë nga shpresa për të gjetur të mbijetuar, pas katastrofës më të rëndë ajrore të Nepalit në dekada.
Siç shkruan BBC, zyrtari Tek Bahadur, ka deklaruar se shanset për të gjetur dikë të gjallë janë “zero”.
Megjithatë, është ende e paqartë se çfarë e shkaktoi përplasjen.
Të paktën 68 njerëz kanë mbetur të vdekur të dielën, kur një fluturim i brendshëm u rrëzua në qytetin Pokhara të Nepalit, ka njoftuar Autoriteti i Aviacionit Civil të vendit, ku edhe u bë përplasja më e rëndë ajrore në tri dekada.
“Ne kemi mbledhur 68 trupa deri më tani. Jemi duke kërkuar për katër trupa të tjerë”, ka thënë Bahadur.
Qindra punonjës të shpëtimit po pastronin kodrën ku avioni i Yeti Airlines, me 72 persona nga kryeqyteti Katmandu, u rrëzua, raporton BBC.
Kjo është përplasja më vdekjeprurëse e Nepalit që nga viti 1992, tregoi baza e të dhënave të Rrjetit të Sigurisë së Aviacionit, kur një Airbus A300 i Pakistanit International Airlines, u rrëzua në një kodër në afërsi të Katmandu, duke mbetur të vdekur të 167 personat në bord.
Kryeministri Pushpa Kamal Dahal thirri një mbledhje urgjente të kabinetit të tij dhe u kërkoi agjencive shtetërore të punojnë në operacionet e shpëtimit. Është ngritur një panel për të hetuar shkakun e rrëzimit.
Nga pasagjerët, 53 thuhet se janë nepalezë. Në aeroplan ishin pesë indianë, katër rusë dhe dy koreanë. Kishte gjithashtu një pasagjer nga Irlanda, Australia, Argjentina dhe Franca.
Aksidentet e aviacionit nuk janë të rralla në Nepal, shpesh për shkak të pistave të tij të largëta dhe ndryshimeve të papritura të motit që mund të shkaktojnë kushte të rrezikshme.
Një aeroplan i Tara Air u rrëzua në maj 2022, në rrethin verior të Nepalit të Mustang, duke lënë të vdekur 22 persona.
Në fillim të vitit 2018, 51 njerëz u vranë kur një fluturim SHBA-Bangla që udhëtonte nga Dhaka në Bangladesh, mori zjarr teksa u ul në Katmandu.