Kryetari i Komunës së Ferizajt, Agim Veliu, ka shprehur ngushëllime për familjarët e katër viktimave që humbën jetën si pasojë e një aksidenti rrugor në rrugën Ferizaj – Shtime.
Ai bëri të ditur se dy nga viktimat janë nga fshati Dremjak i Ferizajt e dy nga Komuna e Shtimes.
Në mesin e tyre është edhe një punonjës i Drejtorisë së Bujqësisë në Komunën e Ferizajt.
“Pa fjalë, të tronditur nga aksidenti i sotëm në magjistralen Ferizaj-Shtime, ku humbën jetën 4 bashkëqytetarë, dy prej tyre nga fshati Dremjak i Ferizajt e dy nga Komuna e Shtimes, në mesin e tyre edhe një punonjës i Drejtorisë së Bujqësisë në Komunën e Ferizajt. Në këto momente dhembje e pikëllimi të thellë, jemi me familjet e tyre, për t’i shprehur ngushëllimet më të sinqerta, për humbjen e më të dashurve të tyre në këtë aksident tragjik”, ka thënë ai.
Nga ky aksident dy persona të tjerë kanë mbetur të lënduar, të cilët janë ende duke u trajtuar në QKUK.
Një nga të lënduarit është një grua shtatzënë kurse burri i saj ka lëndime më të lehta.