Policia e Kosovës, në koordinim me Prokurorinë Themelore të Prishtinës, që nga mëngjesi i së martës janë duke realizuar një aksion në disa lokacione.
Ky aksion ka të bëjë me disa dyshime për kryerje të veprës penale, “mashtrimi në detyrë”, “shmangie nga tatimi”, si dhe dokumente të rrejshme lidhur me tatimin.
Të dyshuar janë disa persona zyrtarë dhe qytetarë të thjeshtë.
“Kryeprokurori i Prokurorisë Themelore në Prishtinë, Zejnullah Gashi, njofton se nën udhëheqjen e kësaj Prokurorie, më konkretisht nga Departamenti për Krime Ekonomike dhe Korrupsion, në koordinim të plotë me Policinë dhe pas aprovimit të Gjyqtarit të Procedurës Paraprake, është duke u zhvilluar një aksion që nga mëngjesi, përfshirë disa lokacione në nivel në Kosovës, mbi dyshimin e kryerjes së veprave penale nga persona zyrtarë e qytetarë, më konkretisht dyshim mbi kryerjen e veprave penale ‘Mashtrimi në detyrë’, ‘Dokumentet e rrejshme lidhur me tatimin’ dhe ‘Shmangia nga tatimi’”, ka deklaruar për Dukagjinin, zëdhënësja e Prokurorisë Themelore në Prishtinë, Laureta Ulaj.
Ajo ka shtuar se Prokuroria Themelore në Prishtinë do të dalë me njoftim kur të mbarojë aksioni.