Ambasadori i Gjermanisë në Kosovë, Jorn Rohde, e ka konfirmuar atë që e kishte deklaruar ambasadori i ShBA-së në Kosovë, Jeff Hovenier, se vendimet e Qeverisë së Kosovës për targat dhe për dokumentet hyrje-dalje, ishin të koordinuara me ShBA-në dhe BE-në.
Këtë deklaratë ambasadori gjerman e dha pas takimit me presidenten e Kosovës, Vjosa Osmani me të cilën ka biseduar për zhvillimet aktuale në vend, me theks të vecantë për veriun e Kosovës.
“Kënaqësi për t’u takuar me presidenten Vjosa Osmani sot, për të diskutuar zhvillimet aktuale, përfshirë vendimin për shtyrjen e zbatimit të vendimeve për targat dhe dokumentet hyrëse – dalëse për datën 1 shtator, në koordinim me SHBA-në dhe BE-në. Theksova se vendimet janë legjitime, plotësisht në përputhje me marrëveshjet në Bruksel”, ka shkruar ambasadori gjerman.
Qeveria e Kosovës e ka shtyrë për një muaj vendimin për zbatimin e reciprocitetit me Serbinë për targat dhe dokumentet për hyrje-dalje, kjo pas kërkesës së ambasadorit të ShBA-së Jeff Hovenier dhe krijimit të situatës së tensionuar.
Ambasadori amerikan në Kosovë, këtë kërkesë e bëri për shkak të përshkallëzimit të situatës në veri të Mitrovicës, respektivisht në pikat kufitare në atë zonë.