Policia e Kosovës ka arrestuar një person të hënën në Mitrovicë të Veriut, nën dyshimin se ka kryer veprën penale “Vjedhje”.
Sipas njoftimit, i arrestuari është një i mitur me inicialet N.Sh., ndërsa për të thuhet se përveç kësaj vjedhjeje, dyshohet se edhe në disa lokale të tjera ka kryer vjedhje në tentativë.
“Me datën 3 prill 2023 rreth orës 05:30, në Mitrovicën e Veriut, pas informacioneve se një person është duke kryer vjedhje në flagrancë, njësitet policore janë nisur në drejtim të këtij lokacioni, me ç’rast kanë arrestuar të dyshuarin me iniciale N. SH. i mitur, i cili përveç se është hasur duke kryer vjedhje në flagrancë, dyshohet se edhe në disa lokale të tjera ka kryer vjedhje në tentativë”, thuhet në njoftimin e policisë.
Tutje, thuhet se gjatë kontrollit nga Njësia e Hetimeve dhe Forenzikës, personit të dyshuar i janë gjetur dhe konfiskuar një sasi prej 8.37 gramësh që dyshohet të jetë lëndë narkotike- marihuanë.
“Në lidhje me rastin është konsultuar prokurori kompetent, i cili ka udhëzuar që të iniciohen rastet ‘vjedhje’ dhe ‘vjedhje në tentativë’, ndërsa personi i dyshuar me vendim të prokurorit është dërguar në mbajtje për 24 orë”, thuhet tutje në njoftim.