Policia e Kosovës ka njoftuar se ka arrestuar një person të dyshuar të martën, i cili është zënë duke transportuar 11 kilogramë substancë narkotike që dyshohet të jetë marihuanë.
Sipas Policisë, vetura me të vërejtur zyrtarët policorë ka tentuar të shmanget, ku gjatë largimit ka goditur njërin prej zyrtarëve policorë, duke i shkaktuar lëndime trupore.
“Nga zyrtarët e njësisë kufitare është arritur të ndalohet vetura, të cilën e ngiste i dyshuari E.A., m/k (viti i lindjes 2001). Gjatë kontrollit në veturë janë gjetur dhe sekuestruar substancë e dyshuar narkotike e llojit marihuanë, me peshë të përgjithshme rreth 11 kg”, thuhet në komunikatën e PK-së.
Nga Njësiti i Trafikimit me Narkotikë, në konsultim me prokurorin e shtetit janë ndërmarrë veprime hetimore, duke kryer kontroll në dy shtëpi të banimit, ku nuk është gjetur asgjë e dyshuar.
“Me vendim të prokurorit kujdestar, i dyshuari është ndaluar për 48 orë, kurse është identifikuar edhe një person tjetër i dyshuar, i cili gjendet në kërkim policor”, thuhet në komunikatë.