Është arrestuar një postier nën dyshimin se i njëjti ka larguar një zarf nga zyra e Postës, zarf ky që dyshohet të ketë përmbajtur fotografi të ndjeshme.
Me anë të një komunikate, Drejtoria për hetimin e krimeve ekonomike dhe korrupsionit në bashkëpunim me Prokurorinë Themelore në Prishtinë, kanë arritur të sigurojnë informata dhe prova për zyrtarin e postës (postierin) dhe veprimin që dyshohet të ketë bërë.
“Bazuar në informatat e pranuara, dyshohet se në zarf kanë qenë disa fotografi të ndjeshme. Mbi bazën e dyshimeve Njësiti Rajonal për Hetimin e Krimeve Ekonomike dhe Korrupsionit në Prishtinë, ka arritur të identifikojë të dyshuarin, dhe në konsultim me kryeprokurorin e PTH në Prishtinë, i dyshuari është shoqëruar në polici për intervistë në cilësinë e të dyshuarit, përderisa në cilësinë e dëshmitarit është intervistuar edhe një person tjetër. Mbi bazën e këtyre veprimeve është krijuar dyshimi se i dyshuari mashkull/kosovar me inicialët (M.R,) dyshohet se ka kryer veprën penale ‘Keqpërdorim i pozitës apo autoritetit zyrtar’ nga neni 414 i KPRK-së”, thuhet në njoftim.
Ndër të tjera, bëhet e ditur se sipas vendimit të prokurorit, i dyshuari është dërguar në mbajtje.
“Në konsultim dhe koordinim me prokurorin kujdestar nga PTH në Prishtinë, është lëshuar vendim mbi ndalimin e të dyshuarit dhe i njëjti është dërguar në mbajtje”, thuhet në komunikatë.