Pas vdekjes së 19-vjeçarit si pasojë e një aksidenti të ndodhur orët e para të së premtes, është arrestuar i dyshuari.
I njëjti, dyshohet se kishte qenë duke drejtuar makinën dhe nga pakujdesia, kishte shkaktuar vdekjen e një 19- vjeçari të premten, rreth orës 01:19.
Në raportin 24 orësh të Policisë së Kosovës, bëhet e ditur se në aksident kanë qenë të përfshira, vetura të cilën kishte qenë duke e drejtuar i dyshuari, dy këmbësorë dhe dy vetura të parkuara me targa vendore.
“Është arrestuar i dyshuari mashkull kosovar, për shkak se derisa kishte qenë duke e drejtuar veturën, nga pakujdesia kishte shkaktuar aksident trafiku me fatalitet dhe lëndime trupore. Në aksident kanë qenë të përfshira, vetura të cilën kishte qenë duke e drejtuar i dyshuari, dy këmbësorë dhe dy vetura të parkuara me targa vendore”, thuhet në raport.
Ndër të tjera, theksohet se njëri nga këmbësorët kishte marrë lëndime vdekjeprurëse.
Vdekjen e tij e ka konstatuar ekipi mjekësor në vendin e ngjarjes, ndërsa lëndime trupore ka pësuar këmbësori tjetër i cili pas tretmanit mjekësor në QKUK është liruar në shtëpi.
Ndërsa, i dyshuari sipas raportit ka kërkuar tretman mjekësor.
“Me vendim të prokurorit i dyshuari është dërguar në mbajtje, kurse trupi i pajetë i viktimës është dërguar në IML për obduksion”, thuhet ndër të tjera në raport.
Lajmin për aksidentin e së premtes e kishte konfirmuar zëdhënësja e policisë për rajonin e Prishtinës, Flora Ahmeti, e cila ka bërë të ditur se në aksident kanë qenë të përfshirë dy këmbësorë dhe tri vetura.
Një nga këmbësorët e përfshirë nuk ka mundur t’i përballojë plagët e marra nga aksidenti.
“Rreth orës 01:20 kemi pranuar informatën se në rrugën “Fahri Fazliu” në Prishtinë, ka ndodhur një aksident trafiku me pasoja fatale. Në këtë aksident kanë qenë të përfshirë dy këmbësorë dhe tri vetura ( një veturë në lëvizje dhe dy të parkuara). Si pasojë e aksidentit, lëndime trupore kanë pësuar tre persona, një prej tyre (këmbësor) nuk ka arritur të përballojë plagët dhe i njëjti ka ndërruar jetë”, ka thënë Ahmeti për Portalin Dukagjini.