Presidenti i Këshillit Evropian, Charles Michel, Presidentja e Komisionit Evropian, Ursula von der Leyen dhe presidenti i Francës, Emmanuel Macron, nuk e kanë thënë asnjë fjalë për heqjen e vizave për Kosovën në konferencën për media pas takimit të 27 liderëve të BE-së.
Kosova në këtë konferencë u përmend vetëm nga presidenti i Këshillit Evropian, Michel, në kontekstin e përkrahjes së dialogut Prishtinë-Beograd.
Hapësirën më të madhe në konferencën për gazetarë e pati Ukraina, Moldavia e Gjeorgjia, për dhënien e statusit të vendeve kandidate të BE-së.
“Ne përkrahim konkluzionet nga Përfaqësuesi i Lartë në dialogun mes Prishtinës dhe Beogradit”, ka thënë ai kur foli për shtetet e Ballkanit Perëndimor.
Liberalizimi i vizave nuk u përmend as në konkluzat e Këshillit në takimin e ditës së parë që është zhvilluar të enjten e 23 qershorit.
Presidentja e Kosovës, Vjosa Osmani, gjatë fjalimit në samit, kërkoi që procesit të liberalizimit të vizave t’i jepet fund, duke kërkuar që BE-ja t’i hapë dyert për Kosovën.
“Dua të flas sërish këtu për rëndësinë e jashtëzakonshme të liberalizimit të vizave, me shpresën se këtë herë, vërtetë, do të na dëgjoni. Kjo thjesht ka shkuar shumë larg. Qytetarët e mi ndihen të diskriminuar, pavarësisht se janë populli më proevropian dhe i plotësojnë të gjitha kriteret prej 4 vjetësh. Ata mbeten të izoluar në zemër të kontinentit ku jetojnë”, është shprehur Osmani.
Ndërkaq, pas samitit të BE-së, Presidentja Osmani ka deklaruar se ka marrë mbështetje nga përfaqësuesit e shteteve të BE-së për liberalizimin e vizave. Sipas saj, tani priten vetëm hapat konkretë.
Liderët e 27 vendeve të BE-së do të zhvillojnë edhe të premten e 24 qershorit takimet e tyre, në ditën e dytë të samitit të BE-së.