Të paktën 24 persona kanë vdekur në veri të Perusë, pasi një autobus me 60 pasagjerë u rrëzua në një shkëmb të shtunën, kështu ka njoftuar Policia për mediat lokale.
Agjencia e mbikëqyrjes së transportit të Perusë (Sutran), ka konfirmuar përplasjen në një deklaratë, pa dhënë një numër viktimash ose lëndimesh.
Autobusi, që i takon kompanisë Qorianka Tours, ishte nisur nga kryeqendra Lima dhe destinacion kishte Tumbesin, vend në kufi me Ekuadorin. Për shkaqe ende të paqarta, thuhet se doli nga rruga në afërsi të qytetit Organos, raporton Policia e Perusë.
Sipas agjencisë për mbikëqyrje të transportit, hetimet e hershme treguan se autobusi dukej se kishte një inspektim të përditësuar të sigurisë dhe sigurimin e aksidenteve, raporton Reuters.
Aksidentet rrugore janë relativisht të zakonshme në Peru, me shumë shoferë që drejtojnë automjete në rrugë të pasigurta dhe pa trajnimin e duhur.
Në vitin 2021, 29 njerëz vdiqën kur një autobus u rrëzua nga një autostradë në malet e Andeve.