Kriza energjetike në Kosovë pritet të thellohet përgjatë dimrit dhe sipas Ballkan Grren Foundation, situata nuk ka qenë asnjëherë më e vështirë për furnizimin me energji elektrike.
Hulumtuesi i këtij fondacioni, Besfort Kosova, ka thënë se pritet që një megavat orë energji elektrike të tejkalojë vlerën prej 1000 deri në 1300 euro.
“Situata është alaramante sa i përket furnizimit me energji elektrike por edhe me lëndë të tjera të energjisë. Situata nuk ka qenë asnjëherë më e vështirë se në këtë dimër që po vjen. Pritet që një megavat orë ernergji elektrike të tejkalojë edhe vlerën prej 100-1300 euro, që nuk është parë asnjëherë gjatë sezonit të dimrit”, ka thënë ai për KP gjersa ka theksuar që një gjë e tillë nuk ka ndodhur asnjëherë përgjatë verës në Ballkan.
Me këtë rast, ai ka kërkuar nga Qeveria e Kosovës që kjo e fundit të ndërmarrë masa të reja për kursimin e energjisë elektrike.
“Masa më e lehtë dhe më e shpejtë do të ishte një fushatë mediatike për kursimin e energjisë elektrike si një ndër format më të shpejta dhe më të lehta për të tejkaluar situatën, për shkak se kriza energjetike është evdidente gjatë kohës së dimrit, kur ne kemi një kërkesë shumë të lartë për energji, për shkak të ngrohjes që përdoret për energji elektrike”, ka theksuar ai.
Ndër të tjera, ai ka kërkuar nga Qeveria e Kosovës që kjo e fundit të gjejë forma alternative të furnizimit me ngrohje përgjatë stinës së dimrit.