Shtëpia ku jetonte në Zvicër ish-komandanti Agim Ramadani me familjen, ishte djegur e tëra e të sigurt ishin se nuk ishte bërë nga pakujdesia.
Në “Debat Plus” të RTV Dukagjini, bashkëshortja e tij, Shukrije Ramadani, tregon se djegia e shtëpisë ishte bërë qëllimshëm, e që cak ishte i ndjeri Agim Ramadani.
“Sapo fillova orën, dëgjova sirenat e alarmit të rrezikut të zjarrfikësve. U shqetësova dhe telefonova në shtëpinë tonë, kishim një telefon fiks…parandjeva diçka të keqe dhe para 15 minutash, i lirova nxënësit. Kur u ktheva shtëpia ishte në flak. Kurrë s’e harroj si kam bërtitur si e çmendur. Edhe Agimi ma kishte ngjitur për dy krahët e më thojke ‘Ja ku jam’. Ai e ka pasur një mjekërr goxha të gjatë, edhe flokët dhe ishte djegur aq shumë saqë nuk e njihja, ishte bërë zi. Bërtiti ‘Ja ku jam’, aty erdha në vete. Djalin e kishin marrë motrat medicionale, ishte zbehur e kishte djegur këmbën. Pasi u qetësova, më sqaruan situatën”, ka treguar ajo. “Ka qenë e qëllimshme. Policia na mori dhe na dërgoi. Më kujtohet kishte bunker atë shkolla me çfarë pastërtie. Aty kishte ushqim e rroba për tërë fshatin, Aty na vendosëm…kurrë nuk u gjet kush dhe pse. Ne e dinim. Ishte target Agimi. Atë javë ka qenë i sëmurë dhe ishte në shtëpi. Dikush që e njihte e dinte, ne e dini se target ishte ai”.
Bashkëshortja e Komandantit ‘Katana’ tregon se Agimi kishte pësuar djegie gjersa kishte shpëtuar djalin e një nëne kurde e cila jetonte në të njëjtën ndërtesë.
Ngjarja kishte ndodhur në vitin 1993.
Familja Ramadani u shpërngul në një tjetër kanton për të nisur përsëri nga e para. Shukrija humbi punën, ndërsa Agimi nisi të punonte në një restorant. Më vonë, i njëjti në bashkëpunim me një zvicran, kishte hapur një autoshkollë. Me vete mori edhe dashurinë për artin.
Agim Ramadani hapi qendrën e pare kulturore shqiptare në Zvicër, në bashkëpunim me disa shokë.
“Jeta kulturore lulëzoi. Qendra Kulturore Shqiptare quhej”, tregon Shukrije Ramadani.
Qendra realizoi orë letrare, shfaqje e u bë vend frekuentues për personazhe të famshme shqiptare.