Zyra e Bashkimit Evropian në Kosovë ka përkujtuar masakrën e Reçakut, në 24-vjetorin e saj.
Përmes një njoftimi, Zyra e BE-së në Kosovë ka thënë se i kujtojnë dhe i nderojnë të gjitha viktimat e kësaj masakre, duke shtuar se e ardhmja duhet të sjellë drejtësi dhe lehtësim.
“Sot shënohet 24-vjetori i masakrës së Reçakut. Ne kujtojmë dhe nderojmë viktimat dhe ndajmë dhimbjen dhe zinë e pangushëllueshme të familjeve të tyre. E kaluara nuk mund të zhbëhet, por e ardhmja duhet të sjellë drejtësi, mbyllje dhe lehtësim” thuhet në njoftimin e tyre.
Më 15 janar 1999, në fshatin Reçak të Komunës së Shtimes, u vranë e u masakruan mizorisht 45 shqiptarë të paarmatosur nga forcat serbe.
Vrasja e 45 civilëve shqiptarë në Reçak dhe përballja e ambasadorit Walker me këtë ngjarje
Trupat e shqiptarëve të vrarë ishin ende në një luginë, kur mëngjesin e 16 janarit të vitit 1999, shkoi t’i shihte asokohe shefi i Misionit Verifikues të OSBE-së në Kosovë, William Walker.
Në momentin kur Walker arriti të ishte i pranishëm para trupave të vrarë, ai tha se nuk kishte fjalë “për të përshkruar indinjatën time personale ose atë të të gjithë atyre që ishin me mua, në vendin e asaj që mund të quhet vetëm si një mizori e papërshkrueshme”.