Bashkimi Evropian (BE), të enjten vonë ka thënë se e ka “të pamundur” ta vlerësojë tani për tani një propozim të Qeverisë së Kosovës për ta përpiluar dhe dërguar në Kushtetuese një draft-statut të vetin për themelimin e një Asociacioni të komunave me shumicë serbe, duke thënë se nuk është në dijeni për përmbajtjen e tij.
Zëdhënësi i BE-së, Peter Stano, ka thënë se një draft i tillë duhet të diskutohet edhe me Serbinë dhe me bllokun, i cili e ndërmjetëson dialogun në mes të dy vendeve fqinje prej vitit 2011.
“Përmbajtja e një statuti, që Qeveria e Kosovës ka paralajmëruar ta përpilojë, është e panjohur dhe nuk është diskutuar as me Serbinë, e as me ndërmjetësuesin [e dialogut Prishtinë-Beograd] BE-në. Prandaj, është e pamundur që të vlerësohet përputhshmëria e tij me marrëveshjet e vitit 2013 dhe 2015 në këtë fazë”, ka thënë Stano për REL.
Ministrja e Punëve të Jashtme dhe Diasporës, Donika Gërvalla, në një konferencë për medie, sot ka folur për letrën e drejtuar presidentit të Asamblesë Parlamentare të Këshillit të Evropës, Theodoros Rousopoulos, ku thuhet se Qeveria e Kosovës është duke përgatitur një draft-statut për Asociacionin.
Lexo më shumë: Gërvalla u lutet ndërkombëtarëve që ta marrin seriozisht letrën e saj për “Zajednicën”
Gërvalla në atë letër është zotuar ta dërgojë në Gjykatën Kushtetuese deri në fund të majit, duke theksuar se Qeveria e Kosovës ka shprehur vullnetin dhe se shpreson se zotimi i saj të përmbushet.
E hapa konkretë për Asociacionin në lidhje me KiE-në kishin kërkuar Franca, Gjermania e Italia.