Deputeti i Partisë Demokratike të Kosovës (PDK), Bekim Haxhiu, e ka ftuar Prokurorinë e Kosovës që të hetojë disa raste të pacientëve të vdekur, të cilat, sipas tij, kanë ndodhur për shkak të listave të pritjes në Qendrën Klinike Universitare të Kosovës.
Ai në seancën plenare të kuvendit ka thënë se dikush duhet ta marrë përgjegjësinë, sepse, sipas tij, listat e pritjes janë zgjatur për arsye biznesore të bordit aktual të Shërbimit Spitalor Klinik dhe Universitar të Kosovës (ShSKUK).
“Jam i brengosur dhe i shqetësuar për listat e pritjes në QKUK, e ftoj prokurorinë e Kosovës që të merret me rastet. Janë me dhjetëra pacientë në kardiologji që kanë pritur për një koronografi dhe që ka vdekur. Lista e pritjes nga një javë në kardiologji është zgjatur në një vit dhe vetëm për një procedurë diasgnostifike kanë vdekur disa pacientë”, është shprehur ai.
“Dikush duhet të japë llogari, për arsye se këto lista të pritjes janë zgjatur për interesa biznesore të menaxhmentit aktual dhe bordit aktual të SHSKUK-së”, ka shtuar deputeti.
Po ashtu, ai ka përmendur edhe projektligjin që lejon tërheqjen e mjeteve financiare nga Fondi i Kursimeve Pensionale (Trust).
“Dy vitet e fundit ishin të vështira për qytetarët për shkak të krizave të njëpasnjëshme, për shkak të krizës pandemike, energjetike dhe ekonomike. Ishte kërkesë e qytetarëve që t’u mundësohet tërheqja e mjeteve nga Trusti, dhe ne si parti politike e kemi proceduar në kuvend projektligjin”, ka thënë Haxhiu.