“Jemi këtu për të nderuar sakrificën e atyre burrave e grave që janë flijuar për këtë liri të cilën e gëzojmë sot. Jemi këtu për të nderuar ata që për dekada e shekuj kanë punuar palodhshëm për të gëzuar këtë liri”.
Kështu ka deklaruar zëvendëskryeminstri i Kosovës, Besnik Bislimi, teksa ka bërë homazhe në Kompleksin Memorial “Adem Jashari” në Prekaz, për nder të shënimit të ditëlindjes së heroit legjendar, Adem Jashari dhe 110-vjetorit të Pavarësisë së Shqipërisë.
Ai ka thënë se Qeveria e Kosovës, për 365 ditë, do të punojë që zotimet e heroit, Adem Jashari, të realizohen.
“Jemi këtu edhe për të reflektuar për ato obligime, të cilat ende nuk i kemi përmbushur si Qeveri e Kosovës zotohemi se për 365 ditë të çdo viti do të punojmë që zotimet e komandantit legjendar Adem Jashari, por edhe komandantëve të tjerë që nga koha e Skënderbeut përfundimisht të realizohen”, ka vijuar ai.
Po ashtu, duke bërë homazhe janë parë edhe ministrat e kabinetit qeveritar dhe deputetë të Lëvizjes Vetëvendosje.
