“Ky është raporti i parë pas aplikimit tonë në BE. Raporti mes tjerash konstaton se qeveria ka vazhduar me agjendën e reformave ambicioze drejt anëtarësimit në BE”.
Kështu ka thënë zëvendëskryeministri Besnik Bislimi në një konferencë për media me shefin e BE-së, Tomasz Szunyog, pas dorëzimit të Raportit të Progresit për Kosovën.
Bislimi ka thënë se Kosova e ka dëshmuar se është aleate e BE-së, por sipas tij, edhe BE-ja duhet ta dojë Kosovën brenda saj.
“Kosova ka nevojë për mbështetje shtesë e assesi për kushte e parakushte shtesë për qasje në fonde. Sa i përket kuvendit, efikasiteti i tij matet me numrin e miratuar të ligjeve dhe jo me arritjen e kuorumit. Sa i përket reformës në administratën publike, Qeveria ka miratuar një sërë dokumentesh cilësore në këtë fushë. Kosova ka dëshmuar që është aleate e BE-se dhe edhe BE-ja duhet të dëshmojë e do Kosovën brenda saj. Procesi i anëtarësimit duhet të bazohet në meritokraci, por s’mund të flasim për nëse Kosova nuk është duke u vlerësuar sipas kritereve të Kopenhagës. Largimi i masave ndëshkuese do ta kthente motivimin dhe do t’i përshpejtonte reformat”, ka thënë Bsilimi.
Ndërkaq, Bislimi i pyetur se ku dështoi Kosova për vlerësimin e ulët në Raportin e Progresit, ai ka thënë se Raporti nuk e vlerëson Kosovën si progres të limituar.
“Raporti nuk e vlerëson Kosovën si progres të limituar. Ka në disa fusha ku thuhet progres i limituar. Nuk mundesh me thanë që investimet janë rritur për 88 për qind dhe progres i limituar… Ka arsye për diskutim edhe për kualitetin e vlerësimit”, është përgjigjur Bislimi.
E Szunyog ka thënë se nuk është notë e keqe, sipas tij, ekziston progresi, por duhet të fuqizohet në disa fusha.
“…Edhe progresi është kah mesi, që nuk është notë e keqe. Sa i përket balancit të përgjithshëm, ekziston progresi, duhet të fuqizohet në disa fusha”, ka thënë ai.