Gazetarja veterane e CNN, Christiane Amanpour, ka anuluar një intervistë me presidentin iranian, Ebrahim Raisi, pasi ai kërkoi që ajo të mbante një shami për takimin e tyre në Nju Jork.
Amanpour theksoi se asnjë president i mëparshëm nuk e kishte kërkuar këtë kur ajo i intervistoi ata jashtë Iranit.
Ajo thotë se një ndihmës i Raisit i tha se ishte për shkak të “situatës në Iran”.
Vdekja e një gruaje të arrestuar në Iran për shkeljen e rregullave të shamisë ka shkaktuar trazira të dhunshme atje.
Mahsa Amini, 22 vjeç, ra në koma javën e kaluar, disa orë pasi policia e moralit e arrestoi atë.
Oficerët thuhet se kanë rrahur kokën e zonjës Amini me shkop dhe e kanë goditur kokën e saj në një nga automjetet e tyre. Policia ka thënë se nuk ka prova për ndonjë keqtrajtim dhe se ajo pësoi “insuficiencë të papritur të zemrës”.
Protestat, tashmë në ditën e tyre të shtatë, kanë arritur në 80 qytete dhe qyteza të tjera në Republikën Islamike. Të paktën 17 persona janë vrarë .
Intervista do të ishte e para e zotit Raisi në tokën amerikane, gjatë vizitës së tij në Asamblenë e Përgjithshme të OKB-së.
Amanpour tha se kishte qenë gati ta bënte atë kur një nga ndihmësit e presidentit këmbënguli që ajo t’i mbulonte flokët me kërkesë të zotit Raisi.
“Jemi në Nju Jork, ku nuk ka asnjë ligj apo traditë në lidhje me shamitë”, tha ajo më vonë në Twitter.
Amanpour tha se ndihmësi i zotit Raisi e kishte bërë të qartë se një intervistë nuk do të ndodhte nëse ajo nuk mbante shami, duke thënë se ishte “çështje respekti”.
Ekipi i saj u largua nga intervista duke refuzuar atë që ajo e quajti “gjendjen e paprecedentë dhe të papritur”.
Prezantuesja amerikane postoi më vonë një foto të saj pa shami përpara një karrige të zbrazët ku zoti Raisi do të ishte ulur për intervistën e tyre.
Raisi u zgjodh vitin e kaluar dhe nënshkroi një urdhër në gusht për të zbatuar një listë të re kufizimesh.
Këto përfshinin futjen e kamerave të vëzhgimit për të monitoruar dhe gjobitur gratë e pambuluara ose për t’i referuar ato për “këshillim” dhe një dënim të detyrueshëm me burg për çdo iranian që vinte në dyshim ose postonte përmbajtje kundër rregullave të hixhabit (shamisë) në internet.
Kufizimet çuan në një rritje të arrestimeve, por gjithashtu shkaktuan një rritje të grave që postonin foto dhe video të tyre pa shami në mediat sociale – diçka që është intensifikuar vetëm në ditët pas vdekjes së zonjës Amini.
Është një pyetje me të cilën ballafaqohen gra korrespondente kur intervistojnë zyrtarë të lartë ku shamitë janë një problem. Kur punojmë në Iran, ku mbulimi është i detyrueshëm, na është dashur të respektojmë.
Në të kaluarën, zyrtarët iranianë kanë pranuar se rregulli nuk zbatohet përtej kufijve të tyre. Por imazhi i një korrespondenteje femër të zbuluar – dhe një me prejardhje iraniane – që merr në pyetje një president ultrakonservator për atë që tani është një çështje shpërthyese në shtëpi duhet të jetë parë si shumë e rrezikshme politikisht.
Ekziston një ndjeshmëri e ngjashme në Afganistanin e drejtuar nga Talibanët. Disa talebanë të lartë madje na kanë thënë se nuk mund të ketë imazhe të tyre të ulur me një grua gazetare. Por disa janë më pak të rreptë.
Shumë prej nesh zakonisht udhëhiqen nga ajo që funksionon më mirë për të arritur intervistën më të mirë. Ekziston një ekuilibër midis mosshfaqjes së mungesës së respektit dhe mospranimit të diktateve. Por, kur intervista ka të bëjë me shamitë, kjo është një histori tjetër.