Deputetët letonezë e kanë shpallur zyrtarisht Rusinë “vend sponzorizues të terrorizmit”.
Të enjten e 11 gushtit parlamenti ka deklaruar se veprimet e fqinjit të tij po përbëjnë “gjenocid kundër popullit ukrainas”.
Deputetët gjithashtu iu kanë bërë thirrje vendeve të tjera evropiane që të “shprehin të njëjtin mendim”.
Ndërsa, ministri i jashtëm ukrainas Dmytro Kuleba ka thënë se ai është “mirënjohës” për njoftimin dhe se deklarata ka ndodhur “në kohën e duhur”.
“Rusia është duke përdorur vuajtjen dhe frikësimin, si mjete në përpjekje për të dobësuar moralin e popullit ukrainas dhe të forcave të armatosura, si dhe për të paralizuar funksionimin e shtetit në mënyrë që të pushtojë Ukrainën”, thuhet në deklaratën e parlamentit.
Deputetët kanë akuzuar gjithashtu Moskën për vendosjen e municioneve të ndaluara ndërkombëtarisht “për të përhapur frikë dhe për të vrarë civilë”, raporton euronews.
Vendi anëtar i Bashkimit Evropian ka theksuar se pushtimi i Rusisë është kryer “me mbështetjen dhe përfshirjen e regjimit bjellorus” dhe ka kërkuar sanksione të mëtejshme ndaj Minskut.
Njëkohësisht, Rusia ka lëshuar mohime të përgjithshme se trupat e saj po synojnë civilët në Ukrainë dhe në të njëjtën kohë këmbëngul se nuk është një luftë, por një “operacion special ushtarak”.
Por, Letonia do të rifusë shërbimin e detyrueshëm ushtarak mes tensioneve në rritje me Rusinë pas pushtimit të Ukrainës.
“Ne nuk kemi asnjë arsye të besojmë se Rusia do të ndryshojë sjelljen e saj,” ka theksuar ministri i mbrojtjes Artis Pabriks.
Parlamenti i Letonisë i është bashkuar Estonisë për t’i bërë thirrje Bashkimit Evropian të ndalojë lëshimin e vizave turistike për qytetarët rusë dhe bjellorusë.
Ndërsa, disa analistë e kanë kritikuar propozimin si një “pjerrësi të rrëshqitshme” që mund të kufizojë të drejtat e udhëtimit të civilëve të pafajshëm.