Festivali i filmit të Kosovës “Dokufest”, ka reaguar sot për ngjarjet aktuale lidhur me koncertin e artistes dhe të aktivistes për të drejtat e njeriut, “Peaches” dhe së fundi edhe me sulmin ndaj ekipit të “Nacionales” gjatë marshit protestues në “Shatervan” të Prizrenit.
“Dokufest” ka theksuar se “qëndrojnë të palëkundur si një platformë ku të drejtat e njeriut mbrohen dhe promovohen në mënyrë universale, pa dallim”.
Njëkohësisht, ata janë shprehur se janë të shqetësuar nga përhapja e dezinformatave që sugjerojnë se koncerti i hapjes së “DokuNights” ishte i qasshëm për të miturit, si dhe nga retorika nxitëse e urrejtjes që pasoi.
“Kjo na ka bërë të dyshojmë se ka përpjekje të fshehtë për të minuar misionin tonë për adresimin e të drejtave të njeriut dhe çështjeve sociale përmes artit dhe kulturës”, thuhet në reagimin e tyre në rrjetin social “Facebook”.
Detajet që “Dokufest”-i i ka cekur janë se koncerti i artistes dhe i aktivistes për të drejtat e njeriut, “Peaches” u zhvillua në një zonë të rrethuar mirë, e kufizuar rreptësisht për të pranishmit 18 vjeç e mbi dhe vetëm me bileta të blera.
“Në lidhje me koncertin e artistes dhe aktivistes për të drejtat e njeriut, ‘Peaches’. Koncerti në fjalë u zhvillua brenda një zone të rrethuar mirë, e kufizuar rreptësisht për të pranishmit 18 vjeç e mbi, vetëm me bileta të blera”.
“DokuFest është dhe do të jetë gjithmonë një fener për të drejtat e njeriut. Ne mbetemi të palëkundur dhe të sigurt në misionin tonë për të promovuar të drejtat e njeriut dhe barazinë për të gjithë”, ka përfunduar teksti i Dokufestit.
Ndërsa, në Prizren është mbajtur protestë kundër festivalit të filmit “DokuFest”. E ftuar nga kryeimami i BIK-ut në Prizren, protesta ishte “revoltë” ndaj përmbajtjes së “Dokufest”-it.
Ekipi i Nacionales që ishte prezent për të përcjellë këtë protestë, është sulmuar fizikisht.
Gazetari i Nacionales, Vullnet Krasniqi dhe kameramani dyshohet se janë sulmuar nga disa persona.
Besim Berisha ka thirrur të mbahet ky marsh kundër DokuFest, pasi në natën e parë të këtij festivali është mbajtur një performancë nga disa artistë ku është konsideruar si vulgare për shkak se shumica nga artistët janë shfaqur me veshje që janë vlerësuar si të papërshtatshme për publikun.