Inspektorati Policor i Kosovës ka rekomanduar suspendimin tre zyrtarëve policorë në Drenas, pasi dyshohen për veprën penale “keqtrajtim gjatë ushtrimit të detyrës zyrtare”.
Siç njofton IPK-ja, ngjarja është raportuar të ketë ndodhur më 10 qershor në Drenas, rreth orës 20:00, në një ndeshje në palestrën sportive ku pas përfundimit të saj zyrtarët policorë kishin arrestuar një të dyshuar.
“Rasti është regjistruar në IPK dhe hetuesit janë angazhuar duke ndërmarrë veprime konkrete hetimore. Pas disa veprimeve hetimore në konsultim me prokurorinë kompetente hetuesit e IPK-së në interes të hetimit kanë dhënë rekomandimin për suspendim nga detyra për tre zyrtarë policorë, të cilët janë të dyshuar për veprën penale ‘keqtrajtim gjatë ushtrimit të detyrës zyrtare’.
Veprimet e mëtutjeshme hetimore lidhur me këtë rast do të vazhdojnë nga hetuesit e IPK-së në konsultim të vazhdueshëm me prokurorin përgjegjës”, thuhet në njoftim.