Në kuadër të Panairit të Verës të organizuar në Beograd, kryeministri i Shqipërisë Edi Rama, ka folur edhe për iniciativën rajonale “Ballkani i Hapur”.
Rama, ka deklaruar se “Ballkani i Hapur”, i tejkalon barrierat ekonomike e politike, sipas tij, kjo iniciativë është “një projekt paqeje”.
Iniciativa e “Ballkanit të Hapur”, sipas Ramës do të mundësojë që vendet e Ballkanit, “të mos vuajë më nga hijet e së shkuarës”.
“Fakti që jemi këtu të gjithë së bashku duhet të na inkurajojë edhe më shumë dhe duhet të na bëjë të gjithëve edhe më të bindur se ‘Ballkani i Hapur’, është shumë më tepër se sa ekonomi, shumë më tepër se sa tregti, është shumë më tepër se sa politikë po e po”, ka thënë Rama.
“Ballkani i Hapur, është një projekt paqeje dhe është një projekt bashkëjetese në paqe, është projekt i bashkimit në paqe të një vizioni të përbashkët për paqe, në mënyrë që kjo lagje e vogël e Evropës, të mos vuajë më nga hijet e së shkuarës por të bëhet vend i së ardhmes për rininë tonë”, ka vijuar ai.
Kundër, kësaj iniciative është ende shteti i Kosovës, kurse pro saj janë Shqipëria, Serbia, Maqedonia e Veriut dhe së fundmi edhe Mali i Zi.
Ndërkaq, pro “Ballkanit të Hapur”, janë edhe Shtetet e Bashkuara të Amerikës (ShBA). I dërguari special i Shteteve të Bashkuara të Amerikës, Gabriel Escobar kishte thënë se nëse kjo iniciativë është e suksesshme, atëherë duhet të jetë e hapur për të gjitha gjashtë vendet e Ballkanit Perëndimor, që të përfshihen në nivel të njëjtë.