Kryeministri i Shqipërisë, Edi Rama, ka dënuar aktin e dhunës ndaj kryetarit të Partisë Demokratike, Sali Berisha, i cili u sulmua gjatë të martës së 6 dhjetorit në Tiranë.
Zyra e Kryeministrisë së Shqipërisë, përmes një reagimi, ka thënë se kushdo që përdor dhunë duhet të përballet me forcën e ligjit.
“Dhuna s’ka qenë, s’është e s’do jetë kurrë një mjet për të adresuar çfarëdo çështje apo shqetësimi dhe kushdo e përdor këtë mjet duhet të përballet me të gjithë forcën e ligjit”, thuhet në reagimin e Kryeministrisë, shkruan abc news.
Ndryshe, Sali Berisha u sulmua mesditën e së martës, teksa ai ishte duke ecur në krah të Ilir Metës drejt bulevardit “Dëshmorët e Kombit”, për të marrë pjesë në protestë.
Berisha kishte kërkuar që personi, i cili e ka sulmuar atë, të lirohet.
“Lirojeni mjeranin që më goditi”.
Kjo ishte thirrja e Sali Berishës ndaj autoriteteve, për të riun, Gerti Shehu, që e goditi me grusht mesditën e së martës.