I dërguari amerikan për Ballkanin Perëndimor, Gabriel Escobar, do ta vizitojë Kosovën këtë javë, për të biseduar me liderët e Qeverisë së Kosovës për dialogun në mes të saj dhe Serbisë, si dhe për dinarin e ndalur serb në Kosovë.
Kështu ka njoftuar Departamenti amerikan i Shtetit të dielën, duke theksuar se Escobar do të takohet edhe me komunitetin serb të Kosovës për të potencuar mbështetjen e vazhdueshme të Shteteve të Bashkuara për Dialogun e lehtësuar nga BE-ja për normalizimin e marrëdhënieve ndërmjet Kosovës dhe Serbisë.
“Vizita e tij do ta ritheksojë përkushtimin e Shteteve të Bashkuara për vendet e Ballkanit Perëndimor, të cilat e synojnë integrimin Euroatlantik dhe një bashkëpunim më të thellë rajonal”, thuhet në njoftimin e Departamentit të Shtetit.
Sipas njoftimit, Escobar do ta vizitojë Belgjikën, Kosovën, Austrinë dhe Malin e Zi nga 10 deri më 18 mars 2024.
Ndërsa në Belgjikë, Escobar do të takohet me përfaqësuesin Special të BE-së, Miroslav Lajçak dhe zyrtarë të tjerë të Bashkimit Evropian dhe NATO-s për të diskutuar përpjekjet për të çuar përpara reformat që do të sjellin paqe të qëndrueshme, stabilitet dhe prosperitet në rajonin e Ballkanit Perëndimor.
Në Austri, Escobar do të takohet me Zyrën e Organizatës për Siguri dhe Bashkëpunim në Evropë (OSBE) për Institucione Demokratike dhe të Drejtat e Njeriut (ODIHR) për të diskutuar zgjedhjet e dhjetorit në Serbi dhe zgjedhjet e ardhshme komunale në Serbi dhe zgjedhjet kombëtare në Maqedoninë e Veriut.
Gjithashtu, në vizitën e tij në Malin e Zi, siç thuhet në njoftim, ai do ta theksojë mbështetjen e SHBA-së për një Mal të Zi demokratik, të fokusuar në komunitetin euroatlantik në takimet me qeverinë malazeze, shoqërinë civile dhe udhëheqësit e biznesit.
Së fundmi, Escobar ka ritheksuar se SHBA-ja është e shqetësuar se Qeveria e Kosovës nuk e trajton si partnere, duke shtuar se është diskutuar mënyra se si Qeveria Kurti ka ndryshuar politikën për transaksionet e pagesave që ka të bëjë me dinarin serb, zbatimi i së cilës është diskutuar më herët.