Shoqata e Botuesve Shqiptarë ka organizuar “Festivalin Veror të Librit” me mbështetjen e Bashkisë së Durrësit, Ministrisë së Kulturës, Qendrës Kombëtare të Librit dhe Leximit dhe Ministrisë së Turizmit.
Kjo ngjarje ka bërë bashkë shkrimtarë, përkthyes, botues, pedagogë, aktorë, muzikantë e personalitete të tjera.
Qëllimi i këtij festivali është që të gjallërojë jetën kulturore të qytetit bregdetar dhe të nxisë dashurinë për librin e leximin, veçanërisht, te të rinjtë.
Pesë ditë maratonë kulturore, të mbushura me lexime e takime me autorë të spikatur shqiptarë, panele, tryeza të rrumbullakëta, prezantime e nënshkrime librash kanë qenë vetëm disa nga aktivitetet të cilat e kanë karakterizuar edicionin e këtij festivali.
Në këtë ngjarje të rëndësishme për Durrësin, e cila ka zgjatur për 5 ditë, ka marrë pjesë edhe Biblioteka Universitare e UAMD-së.
Ndryshe, ky festival ka filluar nga e mërkura e 17 gushtit për të vazhduar deri të dielën e 21 gushtit.