Policia e Kosovës ka njoftuar se një person ka raportuar se më datë 15 tetor, rreth orës 21:30, motra e tij ka lindur foshnjën në banesën e saj dhe më pas është dërguar në Klinikën e Gjinekologjisë të Qendrës Spitalore Universitare të Kosovës (QKUK).
Megjithatë, në raportin 24-orësh, nga Klinika e Gjinekologjisë thuhet se foshnja e sapolindur ka vdekur.
“QKUK. Prishtinë 16.10.2023 – 01:15. Nga Klinika e Gjinekologjisë është pranuar informata për një vdekje të një foshnje e cila ishte pranuar në klinikë më datë 16.10.2023 rreth orës 06:15. Lidhur me rastin është intervistuar dëshmitari mashkull kosovar, i cili ka deklaruar se më datë 15.10.2023 rreth orës 21:30, motra e tij e ka lindur foshnjën në banesën e saj dhe më pas është dërguar në QKUK”, thuhet në njoftim.
Ndërkohë, Policia ka vendosur të dërgojë trupin e foshnjës për obduksion në Institutin e Mjekësisë Ligjore (IML).