Ministres së Punëve të Jashtme, Donika Gërvalla, si duket nuk i është lëkundur besimi tek Ambasadori i Kosovës në Kroaci Martin Berishaj.
Berishaj, emri i të cilët është përfolur për një skandal të mundshëm financiar në Slloveni, sipas ministres Gërvalla do të vazhdoj ta ushtroj detyrën e tij në shtetin kroat.
Ministrja Gërvalla, ka bërë të ditur se është takuar dhe kanë biseduar me të, dhe se sipas saj akuzat e drejtuar ndaj tij nuk kanë ndonjë bazë dhe se nuk ka asnjë vepër penalë që e ka kryer ambasadori Berishaj.
“Sa i përket ambasadorit Berishaj, e kam një deklaratë të tij të gjatë me shkrim, ka qenë në ministri kemi biseduar, ne e konsiderojmë si kampanjë të një mediumi kundër tij. Deri në këtë moment që po flasim akuzat nuk kanë diçka të vërtetë. Ka raportime të mediave të tjera që e tregojnë të kundërtën e saj. Ambasadori nuk shkarkohet pa pasur prova për të. Nuk ka asnjë vepër penale që mund ta ketë kryer ambasadori Berishaj”, ka deklaruar ajo.
Gjatë muajit të kaluar emri i ambasadorit të Kosovës në Kroaci, Martin Berishaj u përmend nga mediat sllovene për përfshirje në një skandal financiar.
Kompania MB Consulting e Berishajt sipas disa mediave sllovene pretendohej se ka marrë 600 mijë euro, të cilat janë tërhequr vazhdimisht në para të gatshme. Këto pretendime i ka mohuar vetë ambasadori Berishaj duke paralajmëruar padi për shpifje.
Pas këtyre raportimeve, Agjencia Kundër Korrupsionit, ka nisur procedurat për verifikimin e pasurisë së tij.