Zëdhënësi i Ministrisë gjermane të Mbrojtjes ka konfirmuar planet për dërgimin e rreth 150 ushtarëve gjermanë në Kosovë në prill të vitit të ardhshëm.
Ky njoftim vjen pas raportimit të medias gjermane, Spiegel, që specifikuan se autoritetet gjermane po e shqyrtojnë mundësinë e rritjes së pranisë së tyre në misionin e NATO-s në Kosovë (KFOR).
Dislokimi i planifikuar i Bundeswehr-it vjen pas sulmit terrorist në veri të Kosovës muajin e kaluar, ku mbeti i vrarë rreshteri i policisë, Afrim Bunjaku, dhe tre policë të tjerë u plagosën.
Zyra e kancelarit, Olaf Scholz, ra dakord këtë javë me planet e ushtrisë për të vendosur një kompani të përforcuar të Bundeswehr-it prej rreth 150 ushtarësh në Prishtinë për të mbështetur misionin e NATO-s KFOR, raporton Reuters.
Kjo do të lehtësojë një kompani austriake me bazë atje, sipas raportit, i cili ka thënë se Vjena i kishte kërkuar Berlinit të ndërhynte disa kohë më parë.
Më 1 tetor, Britania e Madhe ka konfirmuar se do t’i dërgojë 400 ushtarë shtesë në Kosovë.
Komandanti i Forcës së Sigurisë Kombëtare (KFOR), gjeneralmajor Angelo Michele Ristuccia, ka thënë se përforcime do të ketë edhe nga Rumania dhe “vende të tjera aleate”.
Ristuccia ka shtuar se incidentet e muajve të fundit, kryesisht në veri të Kosovës, tregojnë që situata mbetet e paqëndrueshme dhe mund të tensionohet shpejt.
Ai e ka përmendur që vetëm një zgjidhje politike do të mund të garantojë paqe të qëndrueshme në rajonin e Ballkanit, dhe e ka përsëritur mbështetjen e KFOR-it për dialogun në mes të Kosovës dhe Serbisë me qëllim të normalizimit të marrëdhënieve.