Zëvendëskryeministri i Maqedonisë së Veriut, Artan Grubi, ka pritur në takim të martën e 16 majit përfaqësuesin special të Republikës Federale të Gjermanisë për Ballkanin Perëndimor, Manuel Sarrazin.
Grubi dhe Sarrazin diskutuan për situatën aktuale politike në vend dhe rajon, për nevojën e miratimit të amendamenteve kushtetuese për të vazhduar rrugën e integrimit evropian, sfidat dhe angazhimin për zbatimin e reformave, si dhe përforcimin e luftës kundër krimit dhe korrupsionit.
“Bashkëbiseduam mbi procesin e miratimit të ndryshimeve kushtetuese, proces i domosdoshëm që duhet përkrahur nga të gjithë, hap që nuk dëmton askënd, përforcon demokracinë dhe determinon të ardhmen evropiane të vendit. E informova z. Sarrazin për themelimin e grupit punues për hartimin e ndryshimeve kushtetuese, për iniciativën e frontit evropian të koalicionit qeverisës, përkushtimin në rrumbullakësimin me sukses të procesit të skriningut, realizimin e reformave dhe përforcimin e luftës kundër krimit dhe korrupsionit”, ka shkruar Grubi në Facebook.
Gjatë takimit, Grubi ka theksuar se u potencua edhe rëndësia e përkrahjes së Gjermanisë në të gjitha sfidat e radhës për vendin dhe rajonin.