Dy burra kosovarë janë sulmuar nga një grup kriminelësh, të cilët kanë qenë të maskuar dhe të organizuar për sulmin e kryer, ka njoftuar Policia e Kosovës.
Përmes një komunikate, bëhet e ditur se si pasojë e sulmeve, dy viktimat kanë pësuar lëndime trupore.
“Më datë 01.06.2023, në Mitrovicë Veri janë sulmuar dy qytetar meshkuj kosovarë, të cilët kanë qenë duke qëndruar në hyrje të sheshit në Mitrovicë Veri. Viktimat janë sulmuar nga një grup kriminelësh të cilët kanë qenë të maskuar dhe të organizuar për sulmin e kryer. Njësitet policore kanë intervenuar menjëherë për të parandaluar sulmin, përderisa personat e dyshuar kanë ikur në drejtime të ndryshme të qytetit të Mitrovicës Veri. Si pasojë e sulmeve dy viktimat kanë pësuar lëndime trupore dhe të njëjtit janë dërguar për trajtim mjekësor”, thuhet në komunikatë.
Tutje, Policia e Kosovës ka njoftuar se do të vazhdojë angazhimet e saja policore, me qëllim të parandalimit, të hetimit dhe të ofrimit të sigurisë ndaj të gjithë qytetarëve në nivel vendi.
Serbët në veri kanë filluar protestën të premten e 26 majit.
Ata nuk po lejonin kryetarët të futeshin në objektin e komunës.
Protestuesit me maska e edhe ata pa maska kanë ushtruar dhunë ndaj pjesëtarëve të KFOR-it, Policisë së Kosovës dhe ekipeve të gazetarëve.
Deri tani, dy vetura të RTV Dukagjini janë vandalizuar.