Gjatë së mërkurës së 21 shtatorit, guvernatori i Bankës Qendrore të Kosovës, Fehmi Mehmeti, ka pritur në takim drejtues të lartë të Fondit Monetar Ndërkombëtar (FMN) të udhëhequr nga zëvendësdrejtori menaxhues i Fondit Monetar Ndërkombëtar Bo Li.
Në këtë takim, guvernatori Mehmeti ka informuar zëvendësdrejtorin e FMN-së, Li dhe përfaqësuesit e FMN-së për performancën e mirë të sektorit financiar në Kosovë, e në veçanti atij bankar dhe ka potencuar rëndësinë e këtij sektori në mbështetje të zhvillimit ekonomik të vendit, thuhet në njoftimin e Bankës Qendrore të Kosovës.
Gjatë takimit, guvernatori i Bankës Qendrore të Kosovës ka shpalosur edhe pikëpamjet e Bankës Qendrore lidhur me zhvillimet makroekonomike në Kosovë.
Guvernatori Fehmi Mehmeti ka shprehur vlerësim ndaj Fondit Monetar Ndërkombëtar, njëkohësisht Mehmeti ka shprehur gatishmëri për të vazhduar bashkëpunimin në të gjitha aspektet me FMN-në.