Deputeti i Partisë Demokratike të Kosovës (PDK), Bekim Haxhiu, në seancën e 18 nëntorit në Kuvendin e Kosovës ka thënë se është shqetësuese në këtë kohë një dikaster si Ministria e Shëndetësisë të mbetet pa ministër.
Ai ka thënë se “mosemërimi i ministrit të Shëndetësisë ka mbetur peng i interesave të VV-së dhe koalicionit qeverisës me Lëvizjen Guxo”.
Haxhiu në këtë seancë ka kërkuar votimin e një rezolute për gjendjen në shëndetësi, pasi sipas tij, themelimi i Komitetit Ekzekutiv nga kryeministri Kurti është bërë vetëm për të mbuluar “dështimet në shëndetësi”.
“Ne kemi kërkuar debat për gjendjen alarmante në shëndetësi, pasi Kurti themeloi komitetin ekzekutiv, për të mbuluar dështimet në sektorin e shëndetësisë. Ai thoshte se gjendja në shëndetësi është tepër e rëndë për t’u menaxhuar vetëm nga ministri, ndërsa tash nuk mban asnjë mbledhje”, ka deklaruar Haxhiu.
Sipas tij, ky komunitet u formua për ta përzënë Rifat Latifin në Amerikë, gjersa ka shtuar se “prej se ai dha dorëheqje nuk u mbajt asnjë takim”.
Deputeti i PDK-së, Haxhiu ka kërkuar reforma në sektorin e shëndetësisë, pasi sipas tij për momentin është një gjendje alarmante.