Qytetarët e Shqipërisë dhe Kosovës që nga sot do të kalojnë përmes pikave kufitare të përbashkëta me procedura të shpejtuara përgjatë 9 muajve të vitit, si dhe në fundjava dhe rastet e festave.
Deri tani kjo periudhë e lehtësimit të lëvizjes së lirë ishte vetëm për 4 muajt e verës.
Më 12 prill hyri në fuqi marrëveshja për lëvizjen e lirë në zonat ndërkufitare mes Shqipërisë dhe Kosovës në 26 vendkalime të ndryshme.
Ndërkohë, në orët e para të ditës së sotme, pika doganore e Morinës është përballur me një fluks të madh udhëtarësh nga Kosova, të cilët udhëtonin drejt Shqipërisë për të festuar Ditën e 1 Majit, por edhe për të kaluar disa ditë pushimi.
Vetëm në orët e para të ditës së sotme, nga Kosova kanë hyrë në Shqipëri rreth 5 mijë shtetas të Kosovës dhe 3 mijë mjete të vogla e dhjetëra autobusë.
Sipas marrëveshjes, do të mundësohet lehtësimi i procedurave të kalimit, verifikimit kufitar në pikën e përbashkët Morinë nga 1 maj deri më 30 shtator dhe nga 1 nëntori deri më 28 shkurt.
Kosova dhe Shqipëria me marrëveshje të re për pikën kufitare Morinë-Kukës