Instituti Kombëtar i Shëndetësisë Publike të Kosovës u ka bërë thirrje qytetarëve për kujdes në ushqimin që e konsumojnë.
IKShPK-ja, përmes një postimi në rrjetin social Facebook, ka shkruar se kujdesi për ushqimin gjatë temperaturave të larta verore është nevojë e shëndetit dhe e mirëqenies njerëzore.
“Në ditët me temperatura të larta, është shumë e rëndësishme që të kujdesemi për sigurinë e ushqimit që e konsumojmë. Përmes ruajtjes dhe përgatitjes adekuate të ushqimit mund të parandalojmë rritjen e baktereve; ruajmë freskinë e ushqimit; shmangim helmimet përmes ushqimit; i ruajmë vlerat ushqyese të tij dhe mundësojmë të zgjatet afati i përdorimit të ushqimit”, thuhet në njoftimin e IKShPK-së.
Kjo thirrje e IKShPK-së u bë për shkak të temperaturave të larta që po mbizotërojnë në vend.