Ani pse shumica absolute e shkollave janë të mbyllura jo të gjithë mësimdhënësit janë pro vazhdimit të grevës.
Kundër po ka edhe shumë prindër. Njëri madje e kishte shprehur këtë ndërmjet një tentimi për sulm ndaj kreut të këshillit grevist, Rrahman Jasharaj.
Por i njëjti është dërguar për 48 orë në mbajtje. Policia ka intervistuar në këtë rast edhe Rrahman Jasharajn.
Ai ka dhënë detaje nga intervistimi gjatë një lidhje në Radio Dukagjini.
“E dhashë atë pjesë time, e thash se një njëri që nuk ka qenë pjesë e institucionit arsimor por as grevist dhe me t’u kryer takimi me mësimdhënësit teksa më përcollën me duartrokitje, një person më kapi me dorën e majte dhe ndoshta ka pasur tendencë që të më godasë por që fatmirësisht ishin aty kolegët e mi. Kam dalë nga shkolla me të vetmin qëllim që të mos krijohen tensione shtesë. Nuk kam pasur asnjë goditje përveç që ka tentuar të më mbajë për dore”, ka thënë Rrahman Jasharaj – SBASHK.
Jasharaj po ashtu ka thënë se I ka reduktuar lëvizjet e tij që mos të përsëritën raste të tilla.
“Uroj që të jetë e fundit, lëvizjet i kam kufizuar me këshillën e kolegëve të mi, jo për frikë nga unë. Po, i kam kufizuar lëvizjet jo për shkak të frikës por për t’i ikur asaj që kinse po shes trimëri. Sa më shpejt që Qeveria ulet me ne për dialog, situatën do ta kemi të qetë, përndryshe me tensione e me shantazhe, asgjë nuk zgjidhet”, ka shtuar Rrahman Jasharaj – SBASHK.
Pos kësaj SBASHK-u gjatë ditës kanë kërkuar që të ndalën presionet dhe shantazhet në rrjetet sociale ndaj kreut të kësaj sindikate.
Për këtë deklaratë televizioni ka kërkuar qëndrim nga Ministria e Arsimit të cilët nuk e kanë komentuar fare.