Zëdhënësi i Prokurorisë Themelore në Pejë, Shkodran Nikçi, ka njoftuar se është dorëzuar kërkesa për caktimin e masës së paraburgimit ndaj të dyshuarit që vrau gruan e tij sot në Pejë.
Në emisionin “FIVE”, Nikçi ka thënë se seanca është caktuar të mbahet sot nga ora 19:30 në Gjykatën Themelore në Pejë.
“Po e kemi dorëzuar kërkesën për caktimin e masës së paraburgimit. Seanca mbahet sot nga ora 19:30 në Gjykatën Themelore në Pejë”, ka deklaruar Nikçi.
Sot, një grua 43-vjeçare është vrarë nga bashkëshorti i saj, i cili ishte dënuar më parë për dhunë në familje.
Nikçi ka thënë se vrasja është kryer në mënyrë makabre dhe se ka ndodhur rreth orës 08:15 në një banesë në qendër të qytetit.
“Vrasja ka ndodhur në qendër të qytetit të Pejës, në një banesë, rreth orës 08:15, ku menjëherë është njoftuar Policia e Kosovës dhe Prokuroria. Vrasja është kryer në mënyrë makabre. Personi i dyshuar është paraqitur në stacionin policor dhe të njëjtit i është sekuestruar arma dhe është ndaluar me urdhër të prokurorit të shtetit për 48 orë fillimisht, ndërsa në vendin e ngjarjes janë kryer ekzaminimet e nevojshme, me urdhër të prokurorit, trupi i pajetë është larguar nga aty për t’u dërguar për obduksion në IML. Më shumë nuk mund t’ju njoftojmë pasi rasti është i ndjeshëm”, ka vijuar ai.