Kryetari i Kuvendit të Kosovës, Glauk Konjufca, ka kërkuar nga Austria mbështetjen për liberalizimin e vizave.
Të hënën e 26 shtatorit, Konjufca është takuar me delegacionin austriak të kryesuar nga kryetari i Parlamentit të Landit të Austrisë së Ulët, Karl Wilfing, i cili shoqërohej nga nënkryetari i parë, Karl Moser dhe deputetët Rene Pfister e Dieter Dorner.
“Konjufca shprehu mirënjohje për mbështetjen të cilën Austria i ka dhënë Kosovës në të gjitha fazat e shtetndërtimit dhe zhvillimit të saj, duke theksuar nevojën e vazhdimit të mbështetjes për liberalizimin e vizave, proceset e integrimit në BE dhe anëtarësimin në organizata ndërkombëtare”, thuhet në njoftim.
Në njoftimin e zyrës së Kuvendit të Kosovës thuhet se, në këtë takim janë vlerësuar raportet e mira dhe partneriteti i fuqishëm midis Austrisë dhe Kosovës.
Po ashtu, është shprehur gatishmëria për avancimin e bashkëpunimit, shkëmbimin e praktikave parlamentare dhe fuqizimin e mëtejmë të miqësisë mes dy shteteve.
Në takim morën pjesë edhe ambasadori i Austrisë në Kosovë, Christoph Weidinger dhe zëvendësi i tij, Martin Schaller.
Ndryshe, ministri i Punëve të Jashtme në Austri, Alexander Schallenberg, ka njoftuar se shteti austriak është pro liberalizimit të vizave për qytetarët e Kosovës.
Kështu ka thënë ai, të hënën në Luksemburg në një takim me përfaqësuesit e 27 shteteve anëtare të Bashkimit Evropian.
“Po ashtu, Bosnjën e cila qysh më 2016, ka aplikuar për ta marrë statusin e vendit kandidat. Kemi situata të ndryshme, por duhet të dërgojmë sinjale të qarta. Ballkani Perëndimor është në oborrin e brendshëm të BE-së. Ne duhet ta kuptojmë se Rusia ka potencial destabilizimi përtej Ukrainës. Jo vetëm në Donbas e Mariupol, por edhe në Republikën Srpska e tutje”, kishte thënë Schallenberg.