Kryetari i Kuvendit të Republikës së Kosovës, Glauk Konjufca, ka thënë se ndonëse nuk e di përmbajtjen e draft-statutit të Asociacionit të Komunave me shumicë serbe në Kosovë, ai është gabim, ngase kryeministri Edi Rama nuk bisedoi me kryeministrin Kurti para se ta bënte këtë veprim.
Konjufca e cilësoi këtë veprim të Ramës si të njëanshëm.
“Nuk mund të paragjykoj për përmbajtjen, nuk e kam parë. Në parim mendoj që është gabim, pavarësisht përmbajtjes. Është një defekt parimor, sepse kryeministri shqiptar nuk do të duhej të bënte veprime të tilla pa u ulë me kryeministrin e Kosovës edhe pa i sqaru të gjitha këto probleme së bashku. Ata takohen shpesh, por ky ishte veprim i njëanshëm”, ka deklaruar Konjufca.
Tutje, kryeparlamentari Konjufca tha se është Enver Hoxhaj nga radhët e Partisë Demokratike të Kosovës (PDK), ai i cili do të duhej pyetur për përmbajtjen e draft-stautit të propozuar të Ramës. Ky reagim i Konjufcës vjen ditë më vonë pasi Hoxhaj deklaroi se e kishte parë draftin të cilin e cilësoi si një “hap të mirë”.
“Nuk kemi interes me e pa, sepse kjo është çështje e institucioneve të Kosovës. Sa i përket përmbajtjes së tij, lirisht kontaktojeni nënkryetarin e Kuvendit, ai tha që e ka pa. Kryeministri shqiptar tha që është sekret, por nënkryetari jonë tha që e ka pa”, ka deklaruar ai.
Konjufca ka thënë se ndonëse shumë drafte kanë qarkulluar deri tani, asnjëri nuk ka pasur efekt në Republikën e Kosovës.
Dy ditë më parë, kryeministri i Shqipërisë, Edi Rama, ua ka propozuar një draft-statut të Asociacionit të Komunave me shumicë serbe presidentit francez Emmanuel Macron dhe kancelarit gjerman, Olaf Scholz, të cilët i cilësoi si “kumbarë” të planit franko-gjerman.
Ky i fundit ka thënë se beson që krijimi i Asociacionit në Kosovë paraqet një derë për hapjen e dyerve ndërkombëtare për Republikën e Kosovës.
Që nga 26 maji, protestat në komunat në veri të vendit janë duke vazhduar pas zgjedhjes së kryetarëve të komunave Zveçan, Zubin Potok dhe Leposaviq.
Protestuesit kanë demoluar veturat e ekipeve të mediumeve kosovare dhe ato të Policisë së Kosovës.
Kosova u përjashtua nga stërvitja ushtarake “Defender 23”, e udhëhequr nga SHBA-ja në Evropë, si shkak i mospërfilljes së këshillave të vetë Shteteve të Bashkuara të Amerikës, (SHBA) lidhur me hapat që sipas tyre duhej ndërmarrë nga ana e Kosovës për uljen e tensioneve në veri.