Lideri i Partisë Demokratike të Kosovës, Memli Krasniqi ka përkujtuar këngëtaren Nexhmije Pagarusha në tre vjetorin e vdekjes së saj.
Krasniqi ka thënë se Pagarusha gjatë jetës së saj udhëhoqi një gjeneratë artistësh drejt misionit të vështirë, por jetik të ndërtimit të skenës kulturore në vend.
“Tri vjet pa bilbilin e Kosovës, Nexhmije Pagarushën. Gjatë një jete me krijimtari, Nexhmija udhëhoqi një gjeneratë të tërë artistësh drejt misionit të vështirë, por jetik, të ndërtimit të skenës kulturore në Kosovë. Përjetësisht në kujtimet dhe zemrat tona, Mbretëreshë”, ka shkruar Krasniqi.
“Sytë për ty i kemi të njomë!”, shtoi ai.
Ndryshe, sot mbushen tri vjet nga shkuarja në amshim e këngëtares Nexhmie Pagarusha, e njohur si Bilbili i Kosovës.
E lindur në maj 1933 në Malishevë, Nexhmije Pagarusha kishte filluar karrierën e saj muzikore në vitin 1948 në Radio Prishtinë. Më 1984 ajo përmbylli karrierën si këngëtare.
Përveç këngëtare ajo ishte edhe aktore filmi e teatri. Për vlerat e punës ajo është nderuar me çmimin “Nderi i Kombit” nga presidenca e Shqipërisë, ndërsa presidenca e Kosovës i ndau çmimin “Artiste e Merituar”.
Nexhmije Pagarusha, vdiq në moshën 86-vjeçare. Ajo la pas vetes plot pesë albume e 88 këngë, prej tyre më të njohurat “Baresha” dhe “Zambaku i Prizrenit”.