“Ndalimi nga ana e Qeverisë i fjalës së Kryetarit të Reçakut, ish-luftëtarit të UÇK-së, Adem Ramadani, në Akademinë Përkujtimore për 24-vjetorin e Masakrës së Reçakut, vetëm pse ai do t’i përmendte Hashim Thaçin e Kadri Veselin në fjalim, fatkeqësisht, është në vazhdën e sulmeve të njëpasnjëshme që ky kryeministër po u bën vlerave të luftës çlirimtare dhe veteranëve tanë”.
Kështu e ka kritikuar kryetari i Partisë Demokratike të Kosovës (PDK), Memli Krasniqi, Qeverinë e Kosovës, duke thënë se po bëjnë “pengim të fjalës së luftëtarëve të lirisë”.
“Gabim mund të quhet kur ndodh një herë, por kur diçka e tillë përsëritet në vazhdimësi, atëherë kemi të bëjmë me qasje e qëllim, me politikë të paramenduar qeveritare”, ka shkruar Krasniqi.
Ndër të tjera, Krasniqi ka kritikuar edhe fjalimin e kryeministrit të Kosovës, Albin Kurti, për politikanin serb, Oliver Ivanoviq, në pesëvjetorin e vdekjes së tij.
“Ndërsa, si për ironi e pa fije turpi, Albin Kurti fjalë të mira dhe elozhe dje thuri vetëm për Oliver Ivanoviqin – të cilin sa ai ishte gjallë, edhe vetë e akuzonte për vrasjen dhe dëbimin e shqiptarëve në Mitrovicë gjatë periudhës së luftës. E pas luftës, Ivanoviqi i dashur i Albinit, ka qenë shefi i ‘Rojave të Urës’ që me dhunë e terror e kanë mbajtur të ndarë qytetin e Mitrovicës”.
“E kuptoj deri diku xhelozinë historike të një veterani të rrejshëm si Albin Kurti, por nënçmimi i veteranëve të Ushtrisë Çlirimtare të Kosovës, nuk do të kalojë asnjëherë para nesh dhe qytetarëve të Kosovës”, ka vijuar ai.